今晚英足盃8強頭場爆發「藍紅大戰」，曼城主場硬撼利物浦。「藍月亮」曼城早前勇奪英聯盃，信心返晒嚟，對住有歐聯後顧嘅「紅軍」利物浦，唔使急可睇定嚟食，加上近期旺開半場和，不妨追多鋪。（Now 651周六晚7時45分直播）文:法達斯維

曼城喺射手艾寧夏蘭特腳風欠順下，上月聯賽分別畀諾定咸森林及韋斯咸逼和，並且於歐聯16強遭皇家馬德里淘汰。正當以為「藍月亮」會繼續下滑之際，喺國際賽期前嘅英聯盃決賽以2比0擊敗阿仙奴，明顯贏在洛迪卡斯簡迪、貝拿度施華等經驗豐富，穩袋一隻盃兼成功止跌，甚至可能成為今季轉捩點，嚟緊專注打聯賽同英足盃，仍有望爭做國內3冠王。

遠藤航膝頭植入人工韌帶
另邊廂，利物浦今季表現更加反覆，各項賽事近6仗只得2勝1和3負，而且經常領先之下「臨尾香」失分，防線喺比賽末段唔集中問題未解決，加上「紅軍」將於嚟緊周中歐聯8強首回合作客巴黎聖日耳門，佢哋上屆正正係畀PSG踢出局，今次唔敢怠慢，主帥施洛今仗難免有所保留。提起歐聯，2月份重傷嘅33歲日本中場遠藤航，日前表示膝頭已植入人工韌帶，雖然好大機會提早收咧，但有望趕及為日本出戰世盃，若然利物浦入到歐聯決賽嘅話，仲有可能上陣添。

講番今仗，曼城無後顧之憂，近5仗有4次半場打和，喺呢類強強對決嘅淘汰賽，必以穩中求勝為策略，初段摸清「紅軍」個底細，易邊後先嚟料，半場和絕對捧得過。