歐聯8強首回合上演重量級戲碼，衞冕球隊巴黎聖日耳門主場迎戰褪色豪門利物浦。一如上季，PSG踏入淘汰賽階段進入「爭標模式」，16強兩回合合計大炒車路士8比2，報回世冠盃決賽一箭之仇，近6次歐聯對英超球隊更錄得5勝1和壓倒性數據；相反「紅軍」近況急轉直下，上仗英足盃淨吞曼城4蛋，難望反彈，主勝屬信心之選。（Now 643周四凌晨3時直播）文:邪神

今場亦係上季歐聯16強翻版戲碼，當時PSG遇上分組賽首名晉級、正值頂峰嘅利物浦，雙方激戰兩回合打成1比1平手，PSG憑互射12碼獲勝晉級，自此青雲直上奪冠而回；今季雙方再度碰頭，PSG強勢持續，繼早前雙殺車路士，返到法甲再炒尼斯4蛋，上場聯賽憑奧士文尼迪比利梅開二度，以3比1擊敗圖盧茲，豪取4連勝，繼續位居法甲榜首。

紅軍頹勢信心崩潰
反觀利物浦今季表現嚴重倒退，難以同PSG抗衡，上仗英足盃8強更以0比4慘敗於曼城腳下，該仗所見「紅軍」表現慘不忍睹，「藍月亮」喺下半場初段攻入第4球後，已經提早鳴金收兵，但其後穆罕默德沙拿12碼宴客，破蛋乏術，令人擔心球員信心崩潰，今仗匆匆到訪巴黎作客，恐怕凶多吉少。

玩埋迪比利「任何時間入球球員」
值得一提，「紅軍」中堅華基爾雲迪積克最近不在狀態，防守速度銳減，上場足總盃已經守唔住安東尼施美安，今場更加防唔到奧士文尼迪比利，所以今場「任何時間入球球員」，可以預埋迪比利。