侯城與米杜士堡將於英冠升班附加賽決賽碰頭，一場過於中立場溫布萊球場爭奪英超席位。升班後包括門票、電視轉播及商品等收入高達21億港元，兩軍為龐大收入肯定步步為營，事實上兩軍近來都旺半場和，不妨再追。（無綫my TV SUPER周六晚10時30分直播）文:渡邊年

今場決賽真係充滿風波，原本侯城對手係修咸頓，但佢哋派職員偷拍搞到被取消資格兼下季要喺英冠扣分，令到附加賽輸波嘅米杜士堡「敗部復活」頂上。跟住侯城班主又表達不滿，指原本球會花咗時間研究對「聖人」，如今要短時間重新適應，認為唔公平，要求將今場比賽延後，更放風如果輸波，唔排除提出訴訟。

備戰時間不足踢得保守
係咪要訴諸法律就之後再算，不過唔多唔少反映，今場兩軍備戰時間不足，預料唔會亂嚟，尤其開波初段，起碼花啲時間摸索，一場過咁重要嘅波，心態上都係唔想輸多過想贏。

侯城踢法一向穩中求勝，近4場全部開半場和，其實米堡喺4強兩回合對修咸頓都係開半場和，證明球隊於淘汰賽踢法亦同樣穩陣，重返頂級聯賽嘅壓力亦會影響表現，似乎半場和係最佳投注選擇。