英超聖誕快車全速開動！今晚榜首3雄分時段出擊，早場先嚟2哥曼城作客諾定咸森林，11點輪到榜首阿仙奴迎擊白禮頓，壓軸仲有奇兵阿士東維拉同車路士合演前列大戰；3大勁旅榜首鬥得難分難解，今晚勢必「踩盡」，務求喺快車期全速衝向冠軍寶座！文:工廠仔

阿仙奴失霸氣為細所逼
阿仙奴今輪主場鬥白禮頓，不過呢支英超榜首近期表現冇乜霸氣，尤其進攻失靈，只能靠堅固防守支撐，近7場得1場入超過2球，面對防守緊密嘅白禮頓難免陷入苦戰，開2.5球入球細機會極高。（Now 621及611周六晚11時直播）

阿仙奴鋒線兵源雖然充裕，但係今季調整進攻戰術後，球員似乎仲未適應，約基利斯及伊比爾治伊斯等人同隊友未產生化學作用，影響進攻流暢性，「兵工廠」近3場比賽嘅4個入波，竟然有3球嚟自對手烏龍波，另一球就係12碼，未見用組織創造嘅清脆入球。

白禮頓作客勁保守
不過阿仙奴防線仍然屬歐洲頂尖級數，威廉沙列巴同迪格蘭賴斯鎮守中後場，等閒之輩難越雷池半步，同時球隊亦出現過分依賴防守嘅「壞習慣」，往往喺領先後就縮，希望靠防守保住勝果，所以今季出現唔少「煲魚生粥」嘅驚險勝仗。

白禮頓今季狀態滑落，上輪0比0打和新特蘭後，已經連續4場不勝，佢哋作客踢得特別保守，近4場作客3次「食白果」，4場總入球全開2球或以下，今晚遇強更加唔敢冒進。翻查兩隊近5次交手，4次總入球開2球或以下，一於追入球細。