歐聯早場波杜基林特對曼城，曼城啱啱輸完畀曼聯，極需要一場重要勝仗振奮士氣，歐聯遇弱旅大有不勝無歸之感，加上射手「魔人」艾寧夏蘭特返回挪威，梗係要喺鄉親父老面前入波威威，預料一開波就會駁火，1.5球半場大玩得過。（Now 643周三凌晨1時45分直播）文:渡邊年

挪超仲未開咧，波杜基林特只能靠熱身賽提升狀態，戰鬥力肯定比唔上季中階段嘅曼城，而且佢哋係今屆歐聯4支仲未開齋球隊之一。

波杜基林特有前無後
不過值得留意嘅係，波杜基林特踢法一向以攻代守，容易出現大量入球，之前對多蒙特、熱刺同布拉格斯拉維亞都踢成2比2，對祖雲達斯同加拉塔沙雷分別輸2比3同1比3，總之就係有前無後，打死罷就。

曼城喺「曼市打吡」輸波後，連續4場英超失分，今場轉戰歐聯，對住實力較差嘅波杜基林特，係最佳「過冷河」時機。

加上夏蘭特曾經效力波杜基林特死對頭莫迪，更加喺2018年聯賽作客時一箭定江山，助莫迪贏波，對呢個球場一啲都唔陌生，有佢喺前面開山劈石，加上「藍月亮」必勝心態，戰意不用懷疑，翻查紀錄，曼城近5場歐聯，4次半場開2球或以上，中位數1.5球半場大好快達標。