今晚沙特職好波連場，其中東網免費直播場次，由艾塔亞文主場迎戰艾哈森。艾塔亞文今季異軍突起，全靠主場瘋狂搶分，撞正近況回落嘅艾哈森，主勝不容錯過。

（on.cc東網周四晚11時15分直播）文:法達斯維

艾塔亞文雖然星味不足，但未計今輪，竟然積分拍得住有C朗壓陣嘅艾納斯，主因係主場戰績強勁，自從季初輸畀艾納斯後，艾塔亞文近6次主場出擊獲5勝1和未輸過，包括擊敗前列分子艾卡迪沙，主場威力唔講得笑。射手羅渣馬天尼斯今季聯賽已入12粒，單計近5仗就狂入6球，配合費堅尼同文達殊等隊友支援，唔愁冇供應。

艾哈森近況勁曳
另邊廂，艾哈森唔單止積分遠遠落後艾塔亞文，狀態明顯跌Watt，近期聯賽輸多贏少，就算主場面對包尾大幡艾拿積馬，都要先落後2球，幾經辛苦至反勝3比2，可想而知其狀態幾曳，因此對住艾卡迪沙、希拉爾等勁旅，輸波亦好正常。艾哈森今仗造訪主場特醒嘅艾塔亞文，好難頂得住，加上艾塔亞文有機會爭下屆亞冠精英盃入場券，戰意唔使懷疑，主勝有計。

至於夜少少開波，有希拉爾主場鬥艾費哈。雖然榜首希拉爾各項賽事豪取20連勝，弗到冇朋友，但近4仗竟有2次半場落後，而且呢4仗半場全開1球或以下，可見初段比較慢熱，艾費哈遇強必死守，不妨捧1.5球半場細。

（周五凌晨1時30分開賽）