周三凌晨德甲，深陷降班漩渦嘅聖保利，喺主場迎戰踢法狂野嘅RB萊比錫。聖保利目前護級形勢水深火熱，極需搶分下，近期踢法明顯變得進取，對住大開大合嘅RB萊比錫駁火味道濃烈，預計會有大手交易，3.5球入球大放心捧。（Now 639周三凌晨3時30分直播）文:工廠仔

聖保利依家只得13分排喺尾2，入球數字亦係全德甲最少，不過佢哋知道要搶分護級，唔可以再一味防守，對住前列分子照樣盡地一煲，早前對多蒙特力戰下僅輸2比3，再之前作客拜仁慕尼黑亦成功先入波，只係最後都要輸1比3，即使最後冇分落袋，亦唔打算坐以待斃。

萊比錫一味靠攻
RB萊比錫要為歐聯席位而戰，對住弱旅聖保利當然唔會留手，不過佢哋有前冇後嘅打法，令成績極度不穩，上月大炒法蘭克福6比0，隨即連輸兩場1比3，主場1比5慘敗拜仁慕尼黑腳下，上場作客又反彈大勝海登咸3球，穩定性仍有待提升。

RB萊比錫成績飄忽，但主攻踢法就始終如一，近7場賽事有5場總入球開4球或以上，挪威翼鋒安東尼奧努沙狀態頗弗，聖保利後衞好難睇得佢住，今場開3.5球入球大機會高唱入雲。