英超兵諾定咸森林，歐霸尾輪主場鬥匈牙利球隊費倫斯華路士。森林上輪大意輸波，取得直入16強嘅機會非常渺茫；費倫斯華路士今屆歐霸盃未輸過，為保前8戰意唔使懷疑，讓球主客和有得受讓，讓球客勝（+1）咪錯過。

（Now 638周五凌晨4時直播）文:法達斯維

森林後顧多多靠唔住
森林今季因成績跌Watt，先後炒咗紐奴同普斯迪高路，不過戴治接手後近況都係麻麻，各項賽事近4仗僅得1勝，而且英超護級大過天，人腳有限下好難兼顧多條戰線。除咗早前英足盃畀域斯咸淘汰外，上輪歐霸盃又因賴恩耶迪斯擺老烏，意外輸畀布拉加0比1，仲有防中艾利洛安達臣食紅牌，今仗要坐波監。森林依家7戰得11分排第16位，落後第8位嘅貝迪斯3分，加上前面仲有7支比佢哋多1至2分嘅球隊，爭入前8剩番「渺茫」同「冇機會」，疊埋心水等踢附加賽好過。

相反，費倫斯華路士形勢大好，佢哋喺歐霸盃演出硬淨，7戰錄4勝3和，係今屆3支仍然不敗嘅球隊之一，暫時排第7位，為保前8必定搏甩髀。呢支由熱刺名宿羅比堅尼執教嘅匈牙利球隊，各項正式賽事近16次客場未輸過，包括近3場歐霸作客打和費倫巴治、擊敗薩爾斯堡同亨克，戰意鮮明唔赦後顧多多嘅森林，讓球客勝（+1）有計。