今晚意甲烏甸尼斯主場迎戰羅馬。烏甸現時排喺中游位置，表現不過不失，對住力爭歐聯資格嘅羅馬，相信會有一戰之力。羅馬踢法守強攻弱，密集賽程下作客會踢得更為謹慎，預料兩隊都唔會製造太多攻門，2.5球入球細屬穩陣之選。（Now 638周二凌晨3時45分直播）文:工廠仔

烏甸3中堅陣式夠硬淨
烏甸今季演出中規中矩，應贏則贏，輸嘅亦唔會任人魚肉，近6場比賽錄得2勝2和2負，輸嘅兩場對科木同國際米蘭，都只係僅負0比1，唔算太失禮。佢哋踢法夠硬淨，後衞奧馬蘇列係今季重奪球權次數最多嘅球員，3中堅陣式唔易被攻陷。

羅馬目前正力爭歐聯席位，佢哋喺加斯柏連尼執教下踢出高效防守，依家屬意甲失球最少一隊，場均失波唔夠0.6球。不過針冇兩頭利，羅馬入球能力同樣唔高，所以近8場賽事，7次總入球開2球或以下，作客亦連續4場總入球唔夠3球，今場造訪烏甸好可能陷入膠着，推介2.5球入球細。