今晚意大利盃8強，阿特蘭大主場迎戰祖雲達斯，兩隊實力接近，對賽互有輸贏，就連入球大細攤路都唔穩定，考起捧場客，邪神搵埋意大利波專家Mic少同渡邊年一齊研究，一致認為祖雲達斯客勝捧得過，皆因阿特蘭大剛高價賣走主力盧卡文，肯定有影響，何況祖記近況唔差，近4場3勝1和，作客有權照贏。

（周五凌晨4時開賽）文:邪神

今個冬季轉會市場交投淡靜，阿特蘭大以4,000萬歐元（約3.7億港元）高價出售進攻主力盧卡文畀馬體會，算係矚目交易之一，睇番盧卡文踢咗阿特蘭大4個球季，上陣137場入55球，賣走佢肯定影響攻力，雖然球隊亦喺馬體會簽入意大利國腳前鋒拉斯柏度尼，但始終未夾熟，佢哋近5場僅贏1場，表現麻麻。

聯賽唔掂決心爭「盃仔」
反觀祖記自從史巴列堤接手後，表現重上正軌，不過意甲同歐聯爭標機會不大，反而意大利盃可以一博，鬥志唔會差，佢哋近況亦對辦，幾位進攻主力約拿芬大衞、韋斯頓堅尼同新星基倫耶迪斯都交到貨，睇好祖記KO阿特蘭大，晉級4強。