英超上演Big6大戰，近期魔性重現嘅曼聯喺主場迎戰熱刺。「紅魔鬼」自卡域克接手後，換帥如換刀，先後擊敗曼城、阿仙奴同富咸豪取3連勝，氣勢之強係近年高峰；相反熱刺飽受傷患折磨，士氣跌落谷底，曼聯勢必追打落水狗，1.49倍主勝放心捧。

（Now 621及611周六晚8時30分直播）文:工廠仔

曼聯同熱刺上季同是天涯淪落人，不過今季熱刺繼續沉淪，「紅魔鬼」喺卡域克接手後就扶搖直上豪取3連勝，尤其係近兩仗末段被扳平後都冇放棄，最終上演絕殺，對球隊士氣同信心都係強心針，食住個勢當然唔會怯場，趁對手病攞埋佢命！

曼聯踢番4-2-3-1陣式後，球員表現大為好轉，明奈復任正選，同般奴費南迪斯、卡斯米路分工清晰，連帶進攻亦效率大增，麥比奧莫、馬菲奧斯根夏、班捷文施斯高3大前鋒亦輪流入波發威，「紅魔鬼」依家1星期1賽情況下，所有球員都養精蓄銳，表現相當有保證。

熱刺傷兵多仲爆內訌
熱刺雖然靠將士用命，上輪逼和曼城2比2，但近6仗聯賽仍未贏過，而且陣中確實傷兵滿營，柏度樸路、雲迪雲、古度斯、賓坦古亞、李察利臣仍未康復，上仗梅開二度嘅蘇蘭基亦因傷上陣成疑，隊長基斯甸羅美路日前再度開火炮轟高層，指球隊只剩11個健康球員卻未獲支援，內憂外患之下，今仗睇嚟凶多吉少。