德甲今輪壓軸好戲，拜仁慕尼黑主場迎戰3哥賀芬咸。拜仁近期表現明顯回落，不過休息過後兼且返主場出擊，有望作出反彈；賀芬咸近況極佳，可惜佢哋一對拜仁就腳軟，近5次交手輸足4場，呢4場全部輸2球或以上，拜仁讓到球半、兩球唔怕辣，照捧上盤。（Now 639周一凌晨零時30分直播）文:邪神

拜仁近2場聯賽接連失分，包括主場輸畀奧格斯堡，上仗亦只能打和漢堡，榜首領先優勢愈嚟愈少，未計今輪就只領先次席多蒙特6分。趁住上周中冇波踢，主帥高柏尼把握時機，放球員2日假抖番順條氣，預計之前抱恙在身嘅哈利卡尼同門將紐亞，今場都可以候命，其餘主力亦「叉足電」，有力重回正軌。

賀芬咸往績蝕晒章
賀芬咸歇冬後5連勝升上聯賽第3位，落後拜仁9分，保持爭標希望，難得有機會拉近距離，賀芬咸今場有可能選擇鬥攻，希望炮製冷門賽果，不過佢哋近年對親拜仁輸多贏少，首循環主場都要慘負1比4，捧拜仁上盤之餘，3.5球入球大都玩得過。