車路士主場迎戰般尼，「車仔」急需搶分爭入前4位肯定會主攻，但防線不穩係一大隱憂。至於般尼為護級冇得縮，隨時同對手駁火，就算輸波都應該可以破蛋。睇番車路士各項賽事近7場有6場總入球開4球或以上，最好揀中位數3.5球嘅入球大。

（Now 621、631及611周六晚11時直播）文:Mic少

車路士僅落後第4位曼聯1分，仍有機會打入前4位，奪取下屆歐聯入場券，前提要保持贏波。「車仔」由羅仙尼亞接手執教後，各項賽事11戰獲得8勝1和2負，包括5場英超有4勝1和，整體成績不俗，要擊敗般尼十拿九穩，主W熱爆燈的確合理。

般尼為護級豁出去
不過，車路士近期經常險象環生，早前對韋斯咸上半場落後2球，最後反勝3比2。之後歐聯對拿玻里同樣上半場落後，憑後勁反勝。歸根究柢都係由於「車仔」攻強守弱。

般尼依家排緊排尾二，現時惟有豁出去，希望會有奇迹。事實上，般尼近期不時有佳作，包括打和熱刺2比2，以3比2擊敗水晶宮，有可能同「車仔」合演入球騷。