周三凌晨歐聯附加賽次回合焦點戰，國際米蘭返主場再鬥波杜基林特。首回合波杜基林特3比1重創國米，「藍黑兵團」已冇退路今場要焗攻，背水一戰毫無保留，波杜基林特從來只攻不守，今場喺聖西路肯定會上演入球騷，中位數3.5球入球大放心捧。（Now 643及644周三凌晨4時直播）文:渡邊年

有睇首回合嘅朋友應該都認同，呢個Match Up快上快落，從觀賞角度絕對一流，當然從博彩角度，走地追大亦非常正斗。挪超「神奇球隊」波杜基林特喺歐聯表現非常亮麗，1球僅敗畀祖雲達斯、逼和熱刺同多蒙特，繼擊敗曼城及馬體會後，再於首回合領先國際米蘭。

波杜基林特齋攻唔守
不過波杜基林特始終難改「有前無後、打死罷就」嘅性格，即使領先都唔識守，預料今場作客一樣唔會縮後，咁就啱晒國米發揮。

事實上首回合「藍黑兵團」無論控球率、射門次數都比波杜基林特高，更曾經有2次射中柱，如果能夠演化成入球，紀錄已經完全改寫。

國際米蘭今季整體表現平穩，喺意甲領先緊次席嘅AC米蘭10分，意盃亦已經殺入4強，現時可以集中精力應付呢場歐聯附加賽生死戰，預料將會主動搶攻，加上波杜基林特喺近6場歐聯賽事，有5次開4球或以上，3.5球入球大穩開。