世界盃歐洲區外圍賽附加賽展開，意大利主場鬥北愛爾蘭。意軍連續第3次跌落附加賽，對上兩次都飲恨，如果再缺席決賽周肯定係大災難，奈何佢哋積弱已久難言惡；北愛作客肯定死守，佢哋近4仗全開2球或以下，首選2.5球入球細。（周五凌晨3時45分開賽）文:邪神

今屆世界盃擴軍到48隊，打入決賽周其實比以往任何一屆都容易，點知意大利都係搞到咁狼狽，分組賽由頭到尾畀挪威食住，結果只能獲小組次名，再度面對附加賽呢座「大山」，經過對上兩次嘅失敗，心理陰影面積大到無倫，去年6月先接手嘅主帥加度素更形容為「存亡之戰」，可見佢哋壓力非常大。

就以分組賽最後兩場所見，意大利只能贏摩爾多瓦2比0，主場對挪威更大敗1比4，已經唔再係世界一線水平，特別係前鋒線，拉斯柏度尼、列迪古同摩斯堅恩只係二線料，辛度東拿利上場英超又因傷缺陣，如果今晚唔出得，意軍攻力更弱，就算贏都係小勝居多。

北愛龜縮搞破壞
北愛爾蘭實力平平，全靠歐國聯名額踢附加賽，今晚作客意大利只有一招，就係龜縮死守搞破壞，盡量拖到入互射12碼博大霧，預計佢哋今場個個楝晒喺禁區頂，一有危險全部大腳清，細盤梗係有計。