世界盃歐洲區附加賽上演全球矚目大戰，波斯尼亞主場迎戰意大利，4屆冠軍意大利能否重返決賽周，在此一戰！意大利已經連續兩屆無緣決賽周，足足兩代人嘅失落，嚟緊食粥食飯睇今鋪，雖然今場要喺作客不利環境比賽，但計質素意軍贏晒，加上近5次交手4勝1和，擺明格食格，讓一球照捧上盤。（Now 618周三凌晨2時45分直播）文:邪神

意大利連續喺2018及2022世盃附加賽出局，距離對上一次參加世界盃已經係12年前，效力祖雲達斯嘅中場悍將文路爾盧卡迪利一番說話，講出意軍全隊心聲，佢話：「好多小朋友從未見過意大利參加世界盃，當我哋想到呢度，嚟緊嘅決賽一定要贏。」

波斯尼亞陣容薄弱難爆冷
意大利上場憑辛度東拿利交出1球1助攻，2比0輕取北愛爾蘭，演出有前有後，呢場勝仗亦令球隊信心大增。今場生死戰意大利陣容會有輕微調整，主帥加度素將起用年僅20歲嘅國米射手比奧艾斯保薛圖，取代列迪古上陣搏殺，其餘位置不變。

另邊廂，波斯尼亞上仗臨完場憑40歲老將迪斯高建功，1比1逼和威爾斯，將比賽帶入加時，最後憑互射12碼淘汰對手，晉級過程可謂死過翻生，但同時球員消耗甚巨，雖然今場有主場之利，但未必回得切氣，事實上該隊陣容相對薄弱，只能起用原班人腳出戰，爆冷機會微。由於屬生死戰，預計角球必多，捧上盤之餘，不妨玩埋9.5球嘅角球大。