今晚瑞典超獨腳戲，馬模主場迎戰佐加頓斯，雙方近況南轅北轍，馬模上仗作客擊敗加爾斯，表現有改善，返回自己地頭，勢必乘勝追擊。相反佐加頓斯走下坡，遭遇兩連敗，加上兩隊近5次聯賽交鋒，馬模取得4勝1負，明顯食住對手，不妨再博主勝。（HOY 76周二凌晨1時直播）文:Mic少

馬模身為瑞典傳統勁旅，今季成績的確比較遜色，僅排聯賽中游，皆因上半季失分太多。會方7月初決定換帥，聘請前波杜基林特助教希斯杜比領軍，波杜基林特上季爆冷打入歐聯16強，佢功不可沒。馬模由希斯杜比接手執教，經過一段時間磨合後，已漸入佳境，近3場贏2場，球員開始重拾信心，勝仗陸續有來。

佐軍2連敗狀態曳
至於佐加頓斯繼0比1不敵華斯特拉斯之後，上仗主場再以1比3輸畀AIK蘇納，而且兩仗都係上半場已經落後，由頭輸到尾，如果馬模今場能夠先開紀錄，勝算就非常高。睇番雙方4月聯賽首循環交鋒，馬模作客贏1比0而回，更何況今仗有地利優勢，贏面更大。