今晚英超有場獨腳戲，由白禮頓主場硬撼般尼茅夫。「海鷗」自三笘薰等傷兵復出後，無論戰績定攻力都有回升迹象；「般茅」雖有射手安東尼施美安跳槽曼城，但有前冇後打法冇變過，今仗鬥攻格局實多波入，3.5球大盤好路。（Now 621周二凌晨4時直播）文:法達斯維

白禮頓近排傷兵問題大有改善，其中日本國腳三笘薰自上年9月尾受傷後，足足抖咗兩個幾月，直到上年年尾先至復出，雖然未必場場擔正，好彩佢亦慢慢重拾狀態，月頭作客曼城更攻入扳平士哥，另一箭頭韋碧克同樣出色，單計聯賽已經射入8粒，老而彌堅。

白禮頓走出谷底力爭上游
隨住攻力回升，「海鷗」各項賽事近4仗獲2勝2和不敗佳績，包括面對曼市雙雄取得1勝1和，宣告走出早前谷底，依家正好係時候搶分力爭上游，主場出擊自然唔會縮。

另邊廂，季初一度有力衝擊歐洲賽資格嘅「般茅」，兵源有限嘅問題逐漸浮現，各項賽事近8仗只得1勝，王牌射手安東尼施美安更喺今個月冬窗轉投曼城，打擊唔細。不過主帥伊拉奧拿主動逼搶嘅進取打法未變，各項賽事近5仗，法定時間入10球同時失13粒，全開4球或以上，絕對係「有前冇後、打死罷就」。雖然施美安已離隊，好彩高洛比同法蘭斯高艾雲尼臣近期分擔入球重任，頻頻有士哥，加上「般茅」已跌到落第15位，現時比尾3嘅韋斯咸多9分，如果再唔振作隨時捲入護級漩渦，作客同樣會以攻代守，3.5球大盤咪錯過。